Mbunge wa Jomvu Badi Twalib amewataka wanahabari nchini kudumisha umoja, mshikamano na ushirikiano ili kuimarisha taaluma ya uanahabari pamoja na kuhakikisha wananchi wanapata habari sahihi, za kuaminika na zenye manufaa kwa jamii. Amesema kuwa wanahabari wana nafasi kubwa katika kujenga jamii yenye uelewa mzuri wa masuala mbalimbali yanayoendelea nchini, hivyo ni muhimu kwao kufanya kazi kwa mshikamano na kuheshimiana.

Badi Twalib amesema kuwa mahusiano mema kati ya wanahabari na wananchi yana mchango mkubwa katika kuimarisha uwajibikaji, uwazi pamoja na maendeleo ya jamii. Ameongeza kuwa wanahabari wanapaswa kuendelea kuzingatia maadili ya taaluma yao ili kulinda heshima ya kazi hiyo muhimu katika jamii.

“Umoja na ushirikiano miongoni mwa wanahabari ni muhimu katika kuhakikisha taaluma ya uanahabari inaendelea kukua na wananchi wanapata habari sahihi na za kuaminika,” alisema Badi Twalib.

Akizungumza katika hafla ya kumstaafisha mwanahabari mkongwe Mohammed Hassan iliyofanyika katika kaunti ya Mombasa, mbunge huyo amewapongeza wanahabari kwa kazi kubwa wanayoifanya ya kuhabarisha wananchi licha ya changamoto mbalimbali wanazokumbana nazo katika utekelezaji wa majukumu yao ya kila siku. Amesema kuwa kazi ya uanahabari inahitaji kujitolea, ujasiri na uzalendo mkubwa kwa sababu wanahabari ndio daraja muhimu kati ya viongozi na wananchi.

Aidha, Badi Twalib amewataka wanahabari chipukizi kujifunza kutoka kwa wale waliowatangulia katika taaluma hiyo ili kuendeleza misingi bora ya uanahabari nchini. Amesema kuwa wanahabari wakongwe wamekuwa na mchango mkubwa katika kuelimisha jamii, kuhimiza uwajibikaji na kuimarisha demokrasia kupitia habari wanazozitoa.

Kwa upande wake, mwanahabari mkongwe Mohammed Hassan amewashukuru wanahabari wenzake, viongozi pamoja na wakazi wa Mombasa kwa ushirikiano alioupata katika kipindi chake chote cha utumishi. Amesema kuwa mafanikio aliyoyapata katika taaluma yake yametokana na ushirikiano, uvumilivu pamoja na kujituma katika kazi yake kwa muda mrefu.

“Ninawashukuru wanahabari wenzangu, viongozi na wakazi wa Mombasa kwa ushirikiano mkubwa mlionipa katika safari yangu ya kazi. Mchango wenu umechangia mafanikio yangu katika taaluma hii,” alisema Mohammed Hassan.

Mohammed Hassan amesema kuwa taaluma ya uanahabari imepitia mabadiliko makubwa kwa miaka mingi huku teknolojia ikibadilisha namna habari zinavyokusanywa na kusambazwa. Amewahimiza wanahabari kuendelea kujifunza na kuendana na mabadiliko ya kiteknolojia ili waweze kutekeleza majukumu yao kwa ufanisi zaidi.

Hafla hiyo imewaleta pamoja viongozi mbalimbali, wanahabari, marafiki pamoja na wakazi wa Mombasa waliojitokeza kumpa heshima Mohammed Hassan kwa mchango wake mkubwa katika sekta ya habari nchini. Waliohudhuria hafla hiyo walimsifu kwa kujitolea kwake katika taaluma ya uanahabari na mchango wake katika kuelimisha jamii kupitia kazi yake ya muda mrefu.

NA NANCY PENDO.