Na Elijah Muthini 

Hali ya hewa kavu inatarajiwa kutawala katika maeneo mengi kwa kipindi chote cha wiki hii (10-16 Februari). Hata hivyo, baadhi ya maeneo yanaweza kushuhudia mvua nyepesi za asubuhi mara kwa mara. Kwa ujumla, hali ya hewa itakuwa tulivu na yenye joto ya wastani.

Vipimo vya joto wakati wa mchana vinatarajiwa kubaki juu, huku kiwango cha juu kikitarajiwa kuwa kati ya nyuzi joto 31°C hadi 33°C. Wakati huo huo, viwango vya chini vya joto vinatarajiwa kuwa wastani wa nyuzi joto 25°C, hali inayoashiria usiku wenye joto la wastani.

Upepo wa wastani utaendelea kuvuma na kushuhudiwa katika maeneo mengi, kwa kasi ya mita 7 hadi 9 kwa sekunde. Hali ya bahari inatarajiwa kuwa tulivu hadi ya wastani, huku urefu wa mawimbi ukitarajiwa kuwa kati ya takribani mita 0.7 hadi 1.6.

Wananchi wanashauriwa kunywa maji ya kutosha, kuepuka kukaa muda mrefu kwenye jua kali, na kuchukua tahadhari muhimu wakati wa shughuli za nje. Wavuvi, mabaharia pamoja na watumiaji wa fuo za bahari wanahimizwa kuendelea kufuata maelekezo ya usalama yanayotolewa na mamlaka husika.